Një seri aktivitetesh në qytete të ndryshme të vendit kanë pasur sot në fokus Ditën Ndërkombëtare për Zvogëlimin e Rreziqeve nga Fatkeqësitë.
Ka qenë Agjencia Kombëtare e Mbrojtjes Civile e cila në bashkëpunim me Kryqin e Kuq, Prefekturat dhe institucionet vendore e qëndrore kanë shfrytëzuar 13 tetorin për të ndezur edhe një herë ndërgjegjësimin e qytetarëve, por edhe informimin.
“Aktivitetet në dhjetëra shkolla të vendit synojnë të përcjellin tek brezat e rinj një kulturë ndërgjegjësuese ndaj zvogëlimit të rreziqeve nga fatkeqësitë, me një theks të veçantë tek vullnetarizmi” – njoftojnë Emergjencat Civile.
Mësohet se në këto nuk munguan edhe diskutimet e hapura dhe shpërndarja e broshurave informuese pranë tendave në sheshe, në prani të përfaqësuesëve të Arsimit, Shëndetësisë, pushtetit vendor etj.
Vetë drejtuesit i AKMC, Haki Çako, ka qenë i pranishëm në një nga takimet me nxënësit në kryeqytet ku u fol për fatkeqësitë natyre që i kanosen vendit tonë.
Çako theksoi se Shqipëria ka qenë së fundmi një rast unik në përballien e fatkeqësive të ndryshme që e kanë goditur në të njëjtën kohë, siç ishin tërmetet e përsëritura, zjarret dhe Pandemia COVID-19.
/a.r
