Dita pa makina, nxënësit lënë mësimin për t’iu bashkuar
Nxënësit e shkollave të Tiranës kanë braktisur orët mësimore për t’iu bashkuar aktivitetit të bashkisë në bulevardin ‘Dëshmorët e Kombit’ ditën e djeshme.
Aktiviteti në emër të ditës pa makina në Tiranë mblodhi në këtë bulevard këmbësorë, fëmijë dhe qytetarë të ndryshëm, por mbi të gjitha mblodhi nxënës nga gjimnazet e shkollat e mesme që kanë vendosur t’i përgjigjen thirrjes së bashkisë që një ditë të vetme të përdorin biçikleta.
Pas shqetësimeve të ngritura në lidhje me braktisjen e shkollës nga nxënësit. Kryebashkiaku Erion Veliaj i është përgjigjur kësaj kritike duke thënë se klasat sportive kishin vendosur ta bënin orën në aktivitetin e bashkisë. Ky aksion, sipas kryebashkiakut të Tiranës,
Erion Veliaj, ka pasur për qëllim edukimin e të rinjve për t’u mësuar me pedalimin dhe lëvizjen e lirë. “Qyteti është edhe i fëmijëve, shkollat janë të qytetit dhe besoj që ajo kulturë që imponohemi me transportin alternativ me ecjen dhe pedalimin është shumë e rëndësishme për nxënësit tanë dhe besoj që kjo ditë ua ofroi këtë”, tha Veliaj. Kryetari i bashkisë deklaroi gjithashtu se ditën pa makina do ta shndërrojë në traditë të paktën një herë në muaj dhe ajo më e afërta do të jetë dita e Çlirimit të Tiranës.
