Ambasadori i Shteteve të Bashkuara të Amerikës në vendin tonë, Donald Lu, është takuar për disa minuta me Presidentin Ilir Meta.
Takimi mes tyre ka qenë rastësor në Varrezat e Dëshmorëve të Kombit, teksa bëheshin homazhe me rastin e 5 Majit.
Kryediplomati amerikan dhe kreu i shtetit janë përshëndetur përzemërsisht, ku shihen të buzëqeshur.
Ky takim vjen një ditë pas deklaratave të forta të ambasadorit amerikan, i cili tha se e mirëpriti faktin që Saimir Tahiri do të përballet me drejtësinë si qytetar i zakonshëm”.
Ai tha se hetimet po vijojnë për ish-ministrin Tahiri dhe ish-kryeprokurorin Adriatik Llalla, duke shtuar se askush nuk është i paprekshëm.
“Askush nuk është mbi ligjin. Mirëpresim faktin që Tahiri do të përballet me drejtësinë si qytetar i zakonshëm, pa imunitet”, – nënvizoi z.Lu.
Ambasadori tha se do ishte i lumtur nëse shoqëria civile u bashkohet thirrjeve për arrestim të peshqve të mëdhenj kriminelë.
Sipas tij, Shqipëria ka mbështetur kapjen e një peshku të madh, si Met Kananai që u kap në Turqi.
“Dy urdhër arreste janë lëshuar edhe për dy peshq të tjerë. Klement Balili dhe Arbër Çekaj. Ata duhet të kapen. Fran Frrokaj dhe Roshi po ndiqen penalisht, hetimet po vazhdojnë ndaj Tahirit dhe Llallës, askush nuk është mbi ligjin”, deklaroi ambasadori amerikan.
Pak orë më vonë, u konfirmua edhe arrestimi i Arbër Çekaj në Gjermani.
