Kreu i qeverisë Edi Rama në komunikimin “Sy m’Sy” me qytetarët u shpreh se pa Partinë Socialiste dita e arrestimeve të personave me pushtet nuk do të vinte kurrë.
Rama ndër të tjera teksa theksoi rolin e PS në reformën në drejtësi u shpreh se ai dhe skuadra e tij vendosën t’i dorëzojmë drejtësisë ‘shpatën e ndëshkimit’ që ka qenë historikisht në duart e pushtetit politik.
Kryeministri Edi Rama komenton reformën në drejtësi, duke sjellë në vëmendje edhe 21 Janarin, ku 4 protestues u vranë në bulevard.
“Sa i përket arrestimeve, duhet ta dish ti dhe të gjithë që kjo ditë, dita e arrestimeve, dita e gjykimeve, e hetimeve të personave me pushtet politik, qofshin ministra apo kryetar bashkie e qofshin kushdo qofshin nuk u vinte pa mua dhe pa Partinë Socialiste. Nuk vinte kurrë se po të vinte do të kishte ardhur që nga 1912. Pra nga 1912 dhe deri kur unë dhe PS bëmë reformën në drejtësi, asnjë nga ata që ka jetuar në këtë vend, nuk e kanë parë asnjë gjë të tillë siç po shohim sot. Dhe pyetja është si ka mundësi që nga 1912 deri kur filloi puna e institucioneve dhe reforma në drejtësi, nuk u bë një hetim, nuk u çua një njeri me pushtet politik përpara një gjyqtari të pavarur se kshu pushkatime dhe varje në litar me gjykata të komanduara ka pasur plot. Unë po flas për prokurorë e gjykatës të pavarur.
Si shpjegohet kjo? Kjo shpjegohet se unë dhe skuadra ime vendosëm t’i dorëzojmë drejtësisë shpatën e ndëshkimit që ka qenë historikisht në duart e pushtetit politik që e ka përdorur për të bërë “drejtësi” duke goditur kë ka pasur oreks të godasë dhe duke mbrojtur me shpatë kë ka dashur të mbrojë. Imagjino të ndodhte sot, që nga kjo zyrë të jepej urdhër për të qëlluar dhe të qëlloheshin me plumba të vërtetë në mish njerëzit dhe të vdisnin, katër vetë të pafajshëm dhe të parrezikshme dhe prokurori, SPAK në këtë rast të lëshonte urdhra-arresti për një numër personash përgjegjës për gjithë procesin e administrimit të protestës dhe unë t’i jepja urdhër drejtorit të përgjithshëm të Policisë ‘nuk arrestohet askush’. E imagjinon dot ti këtë të ndodhë sot. Kjo ka ndodhur miku im, jo para 100 vitesh, por shumë pak kohë më parë, përpara se unë të vija në këtë zyrë. Si shpjegohet kjo? Kush e bëri këtë? Na ra nga qielli, apo e solli Amerika me aeroplan? Këtë e bëri ky që sheh këtu bashkë me ata që e votuan reformën në drejtësi me vullnet të plotë dhe jo ata që erdhën zvarrë për ta votuar”, tha ai.
