Në Ditën Botërore të Hepatitit, Ministri i Shëndetësisë, Ilir Beqaj vizitoi laboratorin e ekzaminimeve në Spitalin Universitar Obstetriko-Gjinekologjik “Mbretëresha Geraldinë” në Tiranë.
Me programin e ri të menaxhimit të integruar të instrumenteve kirurgjikalë të sterilizuar kemi kufizuar ndjeshëm shkallën e përhapjes qe deri dje ishte tej normave të lejuara të infeksioneve spitalore, duke cënuar sigurinë e jetës së pacientëve, u shpreh Beqaj.
Nga ana tjetër, ai ka theksuar dhe ndryshimet në listën e barnave të rimbursueshme gjatë këtyre dy viteve të fundit, pikërisht për pacientët me Hepatit të cilët po trajtohen me medikamente të ribursueshme, barna të cilat mundësojnë shërimin e tyre. Sipas tij, pas 6 vjet përpjekjesh, investuam 70 milionë lekë për instalimin dhe funksionimin në Qendrën Kombëtare të Transfuzionit të Gjakut të sistemit të ri dhe modern të NAT-it (Nucleic Acid Testing), me teknologji që mundëson testimin e gjakut për agjentë infektivë kërcënues për jetën e njeriut të Hepatitit B, C dhe HIV.
Mjekja mikrobiologe pranë Maternitetit “Mbretëresha Geraldinë” ka pohuar se gjatë viteve të fundit ka një ndërgjegjësim të madh të grave të cilat kryejnë analizat e Hepatiti Viral, në mënyrë që vaksinimi i fëmijëve të jetë sa më i shpejtë. Ndërkohë, mjeku Spiro Damo, Shef i Neonatologjisë në këtë spital, ka pohuar se çdo fëmijë vaksinohet brenda 72 orëve të para të lindjes./a.r.
