Çfarëdo rruge që të marrë, Angela Merkel duket se do të gjejë përballë një mur të pakalueshëm. Nga njëra anë kërcënimet e Britanisë së Madhe për të dlë nga Unioni, nga ana tjetër situata brenda partisë së saj, për shkak të krizës greke. Merkel s’ka qenë kurrë në një pozitë kaq të vështirë sa sot. Propozimi i Shauble për nxjerrjen e Greqisë për pesë vjet nga euro, është shenja e situatës aspak të lehtë në të cilën ndodhet sot Gjermania. Problemi është se, cilido qoftë vendimi, kancelarja mund të humbasë në planin e brendshëm apo atë të jashtmin. Ose, edhe në të dyja drejtimet bashkë.
Partia e Merkel, CDU, është tejet skeptike për të akorduar një plan të ri ndihmash për Greqinë. Shumë deputetë kristian-demokratë kanë dyshime për këtë alternativë. Hapur, ata kanë manifestuar dilema, në lidhje me seriozitetin e qeverisë Cipras, për të mbajtur premtimet.
Nga ana tjetër, kriza helene ka tronditur edhe aleancat e vjetra brenda BE, ndër të cilat më e forta është aksi Paris-Berlin. Linja e ashpër e Gjermanisë ndaj Greqisë nuk u ndoq kësaj rradhe nga Franca, e cila e shtyu qeverinë Cipras që të shkruajë planin e ri të propozimeve ndaj kreditorëve. Kjo bën që në Berlin të dyshojnë se presidenti Hollande po përpiqet që të evitojë daljen e Greqisë nga euro, me qëllim që ky hap të mos shpërthejë një reformë drastike brenda zonës Euro. Janë orë delikate, siç sihet, në shumë drejtime. Si për kancelaren, ashtu edhe për Europën e Bashkuar.
