Mikesha e Cassie Ventura, Bryana Bongolan, u ngjit në podiumin e dëshmitarit në seancën e radhës gjyqësore të Sean Diddy Puff.
Ajo citoi të drejtat e saj nga Amendamenti i Pestë kundër vetë-inkriminimit, dhe prokurorët thanë se ajo nuk do të akuzohet për sa kohë dëshmia është e vërtetë.
Bongolan tha se Combs e vari nga ballkoni i katit të 17-të në vitin 2016 përpara se ta përplaste drejt mobiljeve. Ai sulm i ka shkaktuar makthe, u shpreh ajo në gjykatë, duke shtuar se ka pasur periudha kur ulërinte në gjumë.
Ngjarja është përmendur edhe nga Cassie Ventura në padinë e vitit 2023 kundrejt Diddy, si dhe gjatë dëshmisë së saj.
Bongolan ishte me të dashurën e asaj kohe në apartamentin e Cassie kur dëgjoi të trokiturat e Combs.
Menjëherë, e fshehu ish të dashurën në tualet dhe vetë doli në ballkon duke u përpjekur “të sillej normalisht”.
Më pas, Combs e kapi nga pas,”më ngriti dhe më vuri mbi parmak. Po përpiqesha mos të rrëshqisja”, tha ajo.
E pyetur sa kohë qëndroi mbi parmak, Bongolan tha se ai po bërtiste. “Ti e di se ç’ke bërë”, duke shqiptuar çdo rrokje. E gjitha zgjati rreth 15 sekonda.
Në fotot e shfaqura, Bongolan kishte fasha, qafore, si dhe një të nxirë me një plagë në mes. Më pas, u shfaq edhe një foto ku shpina e dëshmitares ishte e fashuar.
Bongolan tha se u njoh me Cassie, të cilën e quan ”një nga mikeshat e saj të afërta”, gjatë kohës kur punonin për një kompani veshjesh. E pyetur se ç’bënin së bashku, ajo u përgjigj: “Drogoheshim”.
Në detaje, përshkruan se ato konsumonin “shumë marijuanë, kokainë, ketaminë dhe të tjera si këto.” Gradualisht, “u kthye në zakon”, tha ajo.
Bongolan hezitonte ta takonte reperin.
“Nuk po më pëlqente ajo që po shihja.”
Ajo sqaron se Ventura ishte e mërzitur kur e telefononte apo me sy të nxirë. Ajo kujtoi një episod kur po flinte gjumë në apartamentin e shoqes dhe u zgjua nga “të trokiturat me forcë” të Puff.
Ajo nuk kujton se çfarë ai thoshte, por mban mend tonin e zërit.
”I acaruar. Mbaj mend që pashë një thikë të fluturonte drejt saj”, u shpreh ajo duke iu referuar Ventura.
“Ajo e hodhi mbrapsht”, tha Bongolan duke kujtuar reagimin e shoqes dhe duke saktësuar se thika nuk e preku Combs.
Përpara jurisë, ajo tha se Combs e furnizonte me drogëra, përfshirë edhe GHB. Këtë të fundit s’e kishte provuar asnjëherë para se t’ia jepte reperi.
Bongolan dëshmoi se e pa Combs “disa herë” duke marrë drogë, përfshirë marijuanë, ketaminë dhe kokainë.
Ajo tha se bashkë me Cassie, u përpoqën të ndalonin së konsumuari drogë, por “është e vështirë të qëndrosh esëll kur ka shumë drogë vërdallë.”
Bongolan dëshmon edhe për një rast të vitit 2016 kur është kërcënuar nga Combs.
“Ai m’u afrua dhe më tha ca gjëra. Ai më erdhi shumë afër fytyrës dhe më tha diçka të tipit, ‘jam djalli dhe mund të të vras’.”
“U tmerrova”, vijon ajo. “Kisha shumë vetëbesim për shkak të kokainës dhe thjesht e kalova.”
Dëshmitarja tha se e ka paditur Combs për 10 milionë Dollarë për “të kërkuar drejtësi për atë që i ndodhi në ballkon.”
E pyetur nga prokurorët nëse do t’i jepte këto 10 milionë Dollarë nëse ajo ngjarje s’do të kishte ndodhur, ajo deklaroi pa hezitim se po.
