DiCaprio fiton gjyqin me revistën “Oops!”
Revista franceze “Oops!” ka humbur betejën ligjore me Leonardo DiCaprion dhe duhet t’i paguajë atij 8 mijë euro dëmshpërblim, pasi revista shkroi se priste një fëmijë nga Rihanna.
Në numrin e muajit maj të revistës titulli kryesor i saj ishte: “Rihanna shtatzënë, pret fëmijën e Leonardos: Ai nuk e do fëmijën”. Siç shkruan “JustJared”, pronari i “Oops”, Frederic Truskolaski, pranoi se nuk e dinin nëse Rihanna ishte shtatzënë: “Menduam se mund të ishte, por sigurisht nuk ishim të sigurt”, deklaroi Truskolaski.
Gjykata vendosi që revista kishte dhunuar të drejtën strikte të privatësisë. Vetë pronari i “Oops” tha se e prisnin këtë vendim, pasi në Francë çdo revistë që flet për jetën private të personazheve të famshme dënohet automatikisht. Lajmi për shtatzëninë e Rihannës me DiCaprion erdhi në një kohë kur dy personazhet e famshëm u përfolën se mund të kishin një lidhje dashurie, zëra që nuk u vërtetuan ndonjëherë.
