Gjatë konsultimit publik për projektligjin e amnistisë fiskale, Kryeministri Edi Rama ka folur edhe për projketin e Skavicës. Ky hidrocentral sipas Ramës është kyç për t’i dhënë Shqipërisë sovranitetin në energji.
Kreu i qeverisë u shpreh se si pasojë e krijimit të liqenit, zona do të bëhet më tërheqëse dhe do të ketë më shumë potencial turistik. “Dibra ka vetëm të mira përpara”, shtoi kryeministri.
“Skavica jo vetëm që është garanci për sovranitetin energjetik të Shqipërisë që nuk e kemi sot. Sot shumë njerëz flasin pa ditur faktet dhe thonë ç’lidhje kemi ne me krizën energjetike, ne kemi hidrocentralet tona. Ndërkohë që ne sot jemi në vitin e 4 që rrezikon, mesa shikojmë, por shpresojmë jo, por të jetë i katërti vit radhazi me thatësirë ekstreme dhe kemi nevojë të importojmë energji. Por edhe kur kemi vitin më të lagësht ne nuk e plotësojmë nevojën për konsum energjetik në Shqipëri. Vizioni ynë për Shqipërinë 2030 dhe plani që kemi në veprim është që Shqipëria të bëhet një vend sovran në energji dhe të kthehet në eksportues neto të energjisë. Energjia nga një burim shqetësimi të vazhdueshëm dhe nga një gropë që thith çdo vit para, të kthehet në një sektor që sjell para nga eksporti. Skavica këtu është kyçi. Ndërkohë që përtej kësaj, e gjithë zona do të jetë 10 herë së paku më tërheqëse dhe do të ketë 10 herë më shumë potencial turistik me liqenin që do të krijohet. Për të gjitha ato banesa dhe toka do të merren masa sipas ligjit. Edhe për to llogaritë janë të qarta. Edhe në rastin e Skavicës na takon ne të informojmë më shumë. Ka shumë dezinformim dhe ka shumë poshtërsi autoktone shqiptare, siç ndodh me çdo gjë që njeriu kërkon të bëjë në këtë vend. Ka një pjesë që është shumica dhe thonë ok dhe ka një pjesë që do u dalë vesi me shpirtin. Nuk kemi çfarë u bëjmë atyre. Mos ki asnjë merak me Skavicën dhe me Dibrën. Dibra ka vetëm të mira përpara. Na ka dalë problem me tunelin për shkak të formacionit gjeologjik, ndërkohë që në tunelin e Llogarisë ecim me shpejtësisë, në tunelin e Murrizit ecim me ngadalë dhe janë gjëra që s’kemi çfarë i bëjmë. Dibra më të mirën e ka përpara”, u shpreh Rama.
/a.r
