Pas një dite të zënë bisedimesh, takimesh dhe negociatash, duket se u gjetën “kushtet”e përshtatshme për krijimin e qeverisë së re në Itali. Pas 3 muajsh ngërci politik duket se kriza politike në Itali është drejt fundit.
Takimi mes Luigi Di Maio dhe Matteo Salvinit ka prodhuar dakordësi për një qeverisje politike me profesor Giusepe Conten si kryeministër. Marrëveshja e arritur mes tyre shmang zgjedhjet e parakohshme në Itali. Pritet nga presidenti Sergio Mattarella të japë verdiktin e tij i cili sipas mediave italiane pritet të jetë pozitiv.
Giovani Tria është zgjedhur si ministër i Ekonomisë dhe ka zevendësuar emrin e kontestuar të Paolo Savones. Ky i fundit nuk është lënë jashtë kabinetit, por i është besuar ministria e Politikave të Komunitetit.
Në marrëveshjen e parë mes dy partive politike u kundërshtua nga presidenti Mattarella që Savona të vendosej si ministër i Ekonomisë pasi ai shihej si një skeptik i fortë ndaj monedhës euro.
Në një lidhje me Skype nga Italia për Report Tv, gazetari i Corriere della Sera, Leonard Berberi, tha se Conte do të ketë vetëm rol administrativ dhe do të jetë i varur nga dy liderat Di Maio-Salvini që e propozuan si kryeministër të vendit fqinj.
