Nesër do të mbahet në Gjykatën e Apelit të Shkodrës seanca për 11 kuksianët e arrestuar pas protestës në rrugën e Kombit.
Deputeti i PD-së për qarkun e Shkodrës, Bardh Spahia u bën thirrje qytetarëve t’i bashkohen protestës nesër kundër gjyqeve politike që sipas tij kujtojnë kohën e dikaturës.
“Të dashur miq, qytetarë të Shkodrës. Nesër paradite në Shkoder tek Gjykata e Apelit zhvillohet gjyqi ndaj 11 të arrestuarve për protestën e Kukësit. Nderi dhe tradita e Shkodrës e do që të jemi sa më shumë dhe të reagojmë sa më fort në mbështetje të tyre dhe kundër gjyqeve politike të cilat na kujtojnë kohët më të errëta të Shqipërisë dhe me të cilat Shkodra dhe shkodranët nuk janë pajtuar as gjatë diktaturës më të eger”, shkruan ai.
Nesër pritet të jetë një situatë e tensionuar në Shkodër pasi përpos protestës nga ana e qytetarëve do të jenë të pranishëm edhe një pjesë e madhe e deputetëve të Partisë Demokratike.
“I gjithë grupi parlamenter i PD-së do jetë aty. Sytë, mendja dhe zemra e çdo demokrati kudo ku ndodhet nesër do jenë në Shkodër. Le të jemi sa më shumë nesër në ora 10 tek gjykata e apelit.
Ju faleminderit”, shkruan deputeti i djathtë.
Prej një muaji tashmë 11 kuksianë mbahen në burg pas protestës së mbajtur në rrugën e Kombit, ku u dëmtuan edhe kabinat e pagesës së tarifës së kalimit.
Për opozitën ata po mbahen padrejtësisht në burg pasi arrestimi i tyre është bërë në shkelje të ligjeve.
a.ç
