Ditët e para të shtatorit kanë shënuar një numër të madh të denoncimit të rasteve të dhunës në familje në qarkun e Elbasanit, periudhë e cila përkon direkt pas vrasjes së gjyqtares Fildez Hafizi nga ish-bashkëshorti i saj.
Në krahasim me të njëjtën periudhë të një viti më parë rastet e denoncuara janë trefishuar. Vera Kënga dhe fëmijët e saj janë pajisur me urdhër mbrojtjeje pasi janë dhunuar nga xhaxhai i tyre, kunati i 41-vjeçares.
Me urdhër mbrojtjeje gjithashtu është pajisur dhe dhunuesi, i cili po ashtu pretendon që është dhunuar nga kunata e tij.
“Nga ana e policisë nuk është marrë asnjë masë. Të gjithë komshinjtë e kanë parë se si ky njeri i ka rrahur fëmijët e mi, se si jemi rrahur barbarisht në mes të lagjes. Kërkojmë drejtësi dhe asgjë më shumë. Jam e frikësuar më shumë për fëmijët sesa veten time”, thotë Vera Kënga për TCH.
Forumi i Gruas në Elbasan gjithashtu pranon se shtimi i rasteve të dhunës në familje ditët e fundit është shtuar ndjeshëm, duke vërejtur me keqardhje se janë shtuar ato raste kur fëmija dhunon nënën.
“Ka rritje të dhunës, por shihet një gjë tjetër shumë negative, rritja e agresivitetit dhe konflikteve në familje”, thotë Dhoksa Gjoka.
Vetëm në javën e parë të shtatorit janë plotësuar 7 kërkesë-padi, prej të cilave 4 kanë marrë urdhër të menjëhershëm mbrojtjeje dhe 3 të tjera urdhër mbrojtjeje, nga dy raste të regjistruara një vit më parë./a.m.
