Komisioni Disiplinor i UEFA-s ka vendosur që t’i japë fitoren ne tavolinë me rezultatin 0-3 Legias së Varshavës ndaj Kukësit për shkak të dhunës së shkaktuar nga tifozët e ekipit verior shqiptar.
Vendimi është dhënë mëngjesin e sotëm, ku theksohet se për shkak të goditjes së lojtarit polak Duda me sende të forta, dhe trazirave të shkaktuara nga tifozët shqiptarë, Kukësi humbet ndeshjen e parë në tavolinë.
Ekipi i Kukësit po ashtu është gjobitur me 70 mijë euro si dhe në 2 pjesëmarrjet e ardhshme në kompeticionet europiane do ti luajë ndeshjet pa tifozë.
Ky është një dënim mesatar për skuadrën kuksiane po të kemi parasysh faktin se ajo rrezikonte të përjashtohej nga kompeticionet europiane. Në këtë mënyrë Kukësi do ketë edhe një shans të fundit përballë ekipit polak këtë të enjte kur të luajë ndeshjen e kthimit në Varshavë.
Takimi i parë i turit të tretë kualifikues të Europa League u ndërpre në minutën e 52-të pasi u godit me sende të forta një prej futbollistëve polak Ondrej Duda.
Komisioni i Disiplinës dhe Etikës në UEFA pasi shqyrtoi çështjen, vendosi në favor të polakëve. Mbi skuadrën shqiptare rëndonin 4 akuza duke filluar me ndërprerjen e ndeshjes, hedhjen e sendeve të forta në fushë dhe banderolë e paligjshme.
