Jamarbër Malltezi, dhëndri i Sali Berishës, i cili është anëtar i kryesisë së Partisë Demokratike dhe njëherazi drejtues i Departamentit për Mjedisin, hedh akuza të ashpra në adresë të ish-Presidentit Bamir Topi.
Shkak mendohet të jenë deklaratat e kreut të FRD një ditë më parë në Report Tv, se Lulzim Basha do të hyjë në histori si lideri që nuk fitoi asgjë, duke iu referuar humbjes së thellë në bastionin e të djathtës, në Dibër.
Malltezi shkruan në Facebook, duke iu referuar Topit, se ligji i dekriminalizimit duhet të përfshijë edhe ata që i kanë vjedhur pronën vëllait.
Dy ditë më parë, Malltezi fyeu rëndë edhe votuesit dibranë, të cilët zgjodhën me votën e tyre si kryebashkiak, kandidatin e majtë, Muharem Rama, duke i dhënë një shuplakë të fortë PD-së dhe duke rrëzuar mitin e bastionit të saj.
Postimi i plotë në Facebook i Jamarbër Malltezit
“Ore, di gjë njeri të më thonë nëse tek Ligji i Dekriminalizimit përjashton nga politika edhe ata që i vjedhin pronën të vëllait të vet? Duhet fut patjetër si amendament. Se shohim që hajdutët që vjedhin deri tokën e vëllezërve të vet doroviten nga pushtat e shtetit dhe altoparlantët e pushtave. Trafikantët dhe drogaxhinjtë tek e fundit i kanë nxirë jetën të tjerëve por jo deri vëllezërve të gjakut. Edhe trafikantët kanë ca kode nderi e nuk janë aq të pështirë”.
shqiptarja.com/d.i.
