Hetuesit italianë kanë mbyllur çështjen për vrasjen e studentit shqiptar Ismail Luli. Prokurorja, Irene Lalliu në seancën dëgjimore u shpreh se, gjithçka është e qartë për vrasjen e 19 korrikut.
Sipas saj, Igli Meta, 20 vjeç, ka vrarë Ismailin me paramendim i nxitur nga inati dhe me ndihmën e Marjo Memës. E gjitha lindi pasi Mema i tha shokut të tij të ngushtë se e dashura e tij e kishte tradhtuar me Ismailin. Ajo, Ambera Saliji, 19 vjeçe ndodhej në shoqërinë e 17-vjeçarit kur mes dy shokëve zhvillohej ky diskutim.
Pas kësaj, Igli Meta bashkë me Marjo Memën e futën në kurth Ismail Lulin, kjo falë dhe një hileje të Amberës.
Në fakt ishte Igli, i cili i kërkoi të dashurës së tij t’i dërgonte një SMS, Ismailit për t’u takuar.
Ky i fundit pranoi duke menduar se do të bisedonte me vajzën që po kalonte një flirt.
Por, në vendin e takimit nuk ishte ajo por Igli dhe Marjo. Ata e futën me forcë në makinë dhe më pas e dërguan në pyll ku nisi dhe masakrimi i të riut.
Pasi e lidhën, u godit gjashtë herë me thikë në gjoks dhe më pas Igli i dha goditjen finale duke e prerë thellë në fyt.
E gjitha kjo sipas dëshmisë së Marjos, ka ndodhur pa praninë e tij pasi kur e thirri Ismaili, 17-vjeçari kishte vdekur.
Marjo e ka ndihmuar Iglin që të pastrojë vendin e krimit dhe të fshehë provat për të shkuar më pas në lumë për të larë gjakun, shkruan Panorama.
Në darkë, Igli i ka rrëfyer të dashurës së tij se ka vrarë Ismailin për xhelozi.
Për të mbuluar të gjithë këtë, ai përdori telefonin e Ismailit për t’i dërguar një SMS nënës së 17-vjeçari, ku i bënte të ditur se do të largohej për në Milano.
Të nesërmen, Igli u përpoq të largohej por u kap dhe u arrestua nga policia. Ai ka pranuar krimin, ndërsa Marjo është përpjekur të distancohet.
Sipas prokurores, Igli e kishte mirë menduar të gjithë këtë ngjarje. Panorama.
