Persona ende të paidentifikuar i thyejnë xhamin e makinës dhe i vjedhin çantën me para Presidentit të ekipit të Kukësit, Safet Gjici. Ngjarja ndodhi të mërkurën, kur makina tip “Toyota” e Gjicit ishte e parkuar para një lokali në Rrugën e Kavajës, në Tiranë.
Në momentin që ka ndodhur vjedhja, vetë Gjici ndodhej në lokal bashkë me shoferin e tij, Rrahman Lushi. Kur kanë dalë nga aty dhe kanë hipur në makinë, kanë konstatuar thyerjen e njërit xham, raporton “Panorama”.
Ndërsa brenda kanë parë që ishte vjedhur një çantë brenda së cilës ndodheshin rreth 200 mijë lekë të rinj, një celular, karta e identitetit dhe një kartë banke.
Ngjarja është denoncuar menjëherë në Komisariatin nr.3 nga shoferi i Gjicit, i cili kishte në përdorim makinën.
Oficerët e Policisë kanë nisur menjëherë hetimet duke filluar me këqyrjen e automjetit të dëmtuar, ku kishte ndodhur vjedhja.
Burimet thanë se nga verifikimet nuk janë konstatuar shenja gishtash të autorëve, që mund të ndihmonte me identifikimin e tyre edhe pse ende nuk dihet nëse ka qenë një person i vetëm apo më shumë.
Ndërsa janë sekuestruar kamerat e sigurisë së lokalit para të cilit ishte parkuar automjeti i Gjicit, të cilat po verifikohen në Komisariatin nr.3, për të zbuluar identitetin e të dyshuarit.
VJEDHJA
Policia e Tiranës tha se, mesditën e së mërkurës, është paraqitur për të bërë kallëzim në Komisariatin nr.3 shtetasi Rrahman Lushi, 33 vjeç, i cili është shoferi personal i Presidentit të Kukësit, Safet Gjici.
Në kallëzimin e tij, Lushi ka treguar se makinës që ka në përdorim, tip “Toyota”, me targë AA 100 LA, i është thyer xhami dhe janë vjedhur paratë e disa sende personale të shefit të tij, që ndodheshin në kroskotin e mjetit.
Ai ka treguar se në momentin që ka ndodhur vjedhja, makina ka qenë e parkuar, para një lokali te Rruga e Kavajës. Në procesverbalin e firmosur në Polici nga shtetasi Rrahman Lushi, deklarohet se në makinë është vjedhur një çantë, brenda së cilës kishte 200 mijë lekë të rinj, një celular, një kartë identiteti dhe një kartë banke, të gjitha në pronësi të 44-vjeçarit Safet Gjici.
“Shtetasi Rr.L., 33 vjeç, banues në Tiranë, kallëzon se në Rrugën e Kavajës, pranë një skare, në mjetin tip ‘Toyota’, i kanë vjedhur një çantë me një sasi lekësh, një celular, dhe dokumente të shtetasit S.Gj., 44 vjeç, banues në Tiranë. Punohet për identifikimin dhe kapjen e autorit”, tha dje Policia e kryeqytetit./Panorama/a.m.
