Policia e Tiranës ka identifikuar tashmë autorin e plagosjes së instruktorit të palestrës, Halim Hysa, 32-vjeçar, që u godit me thikë në ish-Bllok pranë Gjykatës Kushtetuese.
Kështu, “Panorama.al” sjell detaje nga ngjarja. Halim Hysa sapo kishte zbritur nga automjeti i një shoku në rrugicën që ndan Gjykatën nga dy kullat binjake, kur është përballur me katër persona.
Ata e kanë sulmuar dhe më pas njëri prej tyre e ka goditur me thikë në brinjë. Pasi ka marrë goditjen, Hysa ka rendur drejt mjetit të shokut dhe ka mundur të hipë në të.
Ka qenë ai që e ka dërguar në Spitalin e Traumës. Policia është njoftuar për ngjarjen në orën 1:30 të mëngjesit të sotëm.
Gjithashtu, burimet thonë se ngjarja ka ndodhur para policëve që ruanin Gjykatën Kushtetuese. Madje njëri prej tyre ka ndërhyrë për t’i ndarë, por ka thënë që nuk e ka parë momentin e plagosjes.
