Një tjetër grabitje e përmasave të mëdha ka ndodhur në rrugën e Rinasit. Persona me maska, nën kërcënimin e armëve i kanë bërë pritë blindit të një banke private të mbushur me para dhe kanë marrë sipas dëshmitarëve okularë 6-7 thasë të mbushura me para. Ende nuk ka raportime për shumën e grabitur, por dyshohet se ka pasur në mjet më shumë se 2 milionë euro.
*Video, mjeti i parave i goditur me armë në xhama dhe te gomat
Skema e grabitjes duket e ngjashme me atë të vitit të shkuar në rrugën e Rinasit kur i’u bë pritë blindit të Shoqërisë Private të Sigurisë.
Por, ndryshe nga grabitjet e tjera, këtë herë autorët që dyshohen të kenë qenë 5, kanë përplasur blindin e sigurisë.
Autorët ndodheshin me dy automjete, një fuoristradë e zezë dhe një veturë. Furostrada i ka dhënë një goditje ballore mjetit të parave rreth 2 km larg nga rrethrrotullimi i Rinasit, ndërkohë, nga makina e dytë e autorëve, kanë dalë me shpejtësi personat e tjerë me maska që kanë neutralizuar nën kërcënimin e armëve policët privatë që ndodheshin te makina shoqëruese.
Gjithçka ka ndodhur në harkun kohor të 2-3 minutave. Autorët kanë qëlluar disa herë me armë në ajër për të trembur rojat.
Dëshmitarët okularë kanë mundur të filmojnë momentet kur grabitësit marrin thasët me para nga blindi që transportonte paratë e bankës drejt Rinasit. Siç shihet në pamje, rruga është bllokuar dhe qarkullimi ndalet. Pasi marrin të gjitha paratë autorët largohen me shpejtësi me të dy mjetet dhe disa kilometra më larg, braktisin mjetet dhe i vënë flakën. Mjetet u gjetën te ura e Limuthit.
Ndërkohë, policia vijon kërkimet për autorët. Patrulla të shumta janë në ngritur në një hark prej disa kilometra ndërkohë nga ajri patrullon edhe një helikopter./a.m.
