Detaje të reja zbulohen për vrasjen e 38-vjeçares Suela Sula në Shkodër nga bashkëshorti i saj Sadetin Sula 47-vjeç i cili është arrestuar nga Policia e Shkodrës. 47-vjeçari akuzohet se e ka mbytur me duart në fyt bashkëshorten e tij.
Sadetin Sula vazhdon që të jetë në komisariatin e policisë së Shkodrës derisa të dalë përpara gjykatës së shkallës së parë për t’u njohur me masën e sigurisë.
Sadetin Sula është marrë disa herë në pyetje në policinë e Shkodrës dhe dëshmitë e tij janë kontradiktore. Ai nuk e pranon këtë krim dhe thotë se ai është larguar nga mobilieria në mëngjesin e 18 shkurtit dhe pasi është rikthyer aty pas disa orësh e ka gjetur të pajetë në tualetin e mobilierisë bashkëshorten.
Pasi e ka gjetur, ai thotë se ka lajmëruar nipin e tij më pas Policinë. Mirëpo, gjatë dëshmisë, ai ka qenë konfuz sa i përket orareve të lëvizjeve, çka ngre dyshime se është autor i vrasjes së bashkëshortes së tij. Ai ka pranuar se ka patur konflikte kohët e fundit, por nuk pranon vrasjen. Panorama.
