Një ngjarje tragjike ka ndodhur në Babrru paraditen e së enjtes ku një banesë u përfshi nga flakët, duke lënë për pasojë 1 të vdekur.
Viktima është një fëmijë 2-vjeçar ndërsa zjarrfikësit kanë arritur të nxjerrin në kohë vëllain më të madh të viktimës.
Mësohet se dy të miturit ishin pjesëtarë të komunitetit rom.
Ata ndodheshin të vetëm në banesën e improvizuar, pasi prindërit nuk ishin të pranishëm. Mësohet se fëmijët kanë ndezur zjarr pasi temperaturat ishin të ulta, por ndodhi tragjedia.
“Më datë 17.11.2016, rreth orës 08:35, në lagjen Shpat, Babrru, ka rënë zjarr në një banesë, në të cilën ndodheshin dy fëmijë të mitur brenda saj. Si pasojë e këtij zjarri ka mbetur i vdekur fëmija 2 vjeç ende i paidentifikuar”, thuhet në njoftimin e policisë.
Po punohet për sqarimin e plotë të rrethanave./a.m.
