Shoferi i kamionit që u gjet i braktisur në Teksas me dhjetëra të vdekur brenda është akuzuar për kontrabandë emigrantësh.
Homero Zamorano u gjet në një shkurre pranë kamionit në San Antonio dhe u shtir si emigrant, por u arrestua nga policia.
Rreth 53 njerëz vdiqën nga temperaturat e larta dhe dehidratimi, pasi u mbyllën brenda kamionit pa ujë.
Ky është incidenti më vdekjeprurës i trafikimit të qenieve njerëzore në historinë e SHBA.
Sipas një zyrtari të lartë meksikan të imigracionit, shoferi Zamorano, i cili është nga Teksasi, “u përpoq të shtirej sikur ishte një nga të mbijetuarit e tragjedisë kur u gjet nga policia”.
Një i dyshuar i dytë, Christian Martinez, u arrestua me akuza për konspiracion. Prokurorët federalë thanë se Martinez u gjet përmes telefonit të Zamorano, ku pas kontrollit nga hetuesit u zbulua se dyshja kishin komunikuar.
Departamenti Amerikan i Drejtësisë njoftoi se dy të arrestuarit mund të përballen me një dënim maksimal me burgim të përjetshëm, ose ndoshta me vdekje, nëse shpallen fajtorë.
Gjithashtu janë vënë në pranga dhe dy persona të tjerë që u arrestuan në adresën ku ishte regjistuar kamioni.
Viktimat në kamion u zbuluan nga një punëtor, i cili dëgjoi thirrjet për ndihmë. Një pjesë e tyre humbën jetën në spital, duke çuar numrin e të vdekurve në 53.
Një memorial është vendosur në vendin e tragjedisë, rreth 250 km në veri të kufirit SHBA-Meksikë, dhe të mërkurën banorët lokalë të Teksasit u mblodhën atje për të mbajtur zi.
Mësohet se emigrantët brenda kamionit ishin spërkatur me një lëndë djegëse, sipas zyrtarëve, një metodë e përdorur nga disa kontrabandistë për të “maskuar” aromën e qenieve njerëzore dhe për të shmangur zbulimin nga patrullat e qenit.
g.kosovari
