Një ngjarje e rëndë ka ndodhur në orët e para të mëngjesit të sotëm, ku një banese private në Mëzes i është vendosur eksploziv. Për pasojë kanë mbetur të plagosur burrë dhe grua, Lulzim dhe Lirie Selfo, përkatësisht 48 vjeç dhe 40 vjeç.
Shpërthimi ka ndodhur sapo çifti ka hapur derën. Familja nuk ka precedentë penalë dhe se dyshohet se ngjarja lidhet me konfliktet e pronësisë.
Po të njëjtat burime kanë bërë të ditur se lënda eksplozive dyshohet të ketë qenë me mekanizëm të instaluar në derë.
Njoftimi i policisë
Më datë 15.05.2018, rreth orës 06:22 në zonën e Mëzezit, dy shtetasit L. S., dhe L. S., (bashkëshortë) kanë qënë duke dalë për në oborrin e shtëpisë dhe në momentin që kanë hapur derën e shtëpisë ka ndodhur një shpërthim ku si pasojë e shpërthimit kanë mbetur të dëmtuar të dy bashkëshortët.
Shtetasit e dëmtuar janë transportuar në spital për ndihmë mjekësore dhe ndodhen jashtë rrezikut për jetën.
Shërbimet e policisë ndodhen në vendngjarje dhe po punohet për zbardhjen e rrethanave dhe shkakut të ngjarjes.
a.ç
