Ditën e martë, Kosova ka dështuar për të tretën herë, për anëtarësimin e saj në Organizatën e Policisë Evropiane, Interpol.
Në kosovë, fajet për këtë dështim janë shpërndarë, dhe të gjitha palët kanë akuzar njëra-tjetrën, ose edhe Serbinë.
Një pikëamje tjetër ka pasur akademiku, Rexhep Qosja, i cili shprehet se fajtorë për këtë dështim është vetë Kosova.
Reagimi i Rexhep Qosja:
Mjerisht Kosova dështoi edhe për të tretën herë për t’u bërë anëtare e organizëtës ndërkombëtare të Interpolit.
Të gjithë ata njerëz të politikës, të pozitës e të opozitës dhe të gjithë ata analistë që folën për këtë dështim e fajësuan Serbinë!
Dhe duke e fajësuar ata në të vërtetë e ngritën, e madhëruan, e lavdëruan politikën e saj. Serbinë e vogël, Serbinë e shpërfillur prej shumë shteteve në botë sot, ata e bënë shumë të çmuar, sepse e bënë shumë ndikuese e shumë efikase politikën e saj të jashtme!
S’deshën të pohojnë se fajtore për këtë dështim të Kosovës është vetë Kosova!
Politika e jashtme e çdo shteti është shprehje e politikës së brendshme. Politika e jashtme e çdo shteti është fryt i mrekullueshëm apo plotësisht i dështuar i politikës së brendshme.
E politika e brendshme e Kosovës, e komprometuar prej korrupsionit, nepotizmit, pushtimit të shumicës së medieve prej pushtetit e pushtetarëve, të privilegjeve të shumëllojshme të pushtetarëve, të pasurimit marramendës të politikanëve duke qenë në pozita politike, të privatizimit të shtetit pashmangshëm e ka komprometuar edhe politikën e jashtme të Kosovës.
