Një defekt teknik në sistemin e radarit të Aeroportit Ndërkombëtar Capodichino në Napoli ka shkaktuar kaos në trafikun ajror, duke çuar në anulimin e dhjetëra fluturimeve dhe në vonesa të konsiderueshme për udhëtarët.
Autoriteti italian i trafikut ajror, ENAV, bëri me dije se problemi teknik ndodhi në sistemin e radarit që mbulon zonën e qasjes në aeroportin jugor italian. Si masë paraprake dhe për të ruajtur standardet maksimale të sigurisë, është vendosur reduktimi i përkohshëm i fluturimeve hyrëse.
“Sistemi radarik pësoi një defekt mekanik. Kjo ndërhyrje është bërë për të garantuar sigurinë e udhëtarëve dhe personelit ajror,” thuhet në deklaratën zyrtare të ENAV. Autoriteti ka mobilizuar të gjitha burimet teknike dhe operative për të rikthyer kapacitetin e plotë të aeroportit sa më parë të jetë e mundur.
Sipas agjencisë italiane të lajmeve ANSA, si pasojë e këtij defekti janë anuluar 45 fluturime ndërsa fluturime të tjera kanë pësuar vonesa që kanë zgjatur deri në katër orë. Kjo situatë ka krijuar rradhë të gjata në terminale dhe shqetësim tek pasagjerët.
Teknikët janë ende duke punuar për të identifikuar dhe zgjidhur problemin, ndërsa nuk është dhënë ende një afat i saktë për rikthimin e plotë të funksionimit normal të radarit.
