Policia Italiane ka dhënë detaje të reja në lidhje me atentatin që iu mori jetën dy kushërinjve shqiptarëve në periferi të Milanos. Agron dhe Alban Lleshaj u vranë mbrëmjen e së enjtes dhe ndaj tyre u qëlluan të paktën 10 plumba, ndërsa automjeti “Volswagen Polo” me të cilën udhëtonin u përplas me makinat e parkuara anë rrugës dhe u përmbys.
Në fillim policia e Leganos mendoi se bëhej fjalë për një aksident rrugor, por nga këqyrja e vendit rezultoi se vëllezërit shqiptarë ishin vrarë. Agron Lleshaj, 36 vjeç dhe Alban Lleshaj 29 vjeç (nuk dihet e saktë mosha pasi media të ndryshme italiane raportojnë ndryshe), rezidentë në Canegrate prej një viti, sipas mediave italiane thuhet se kanë qene me precendentë penalë për trafik droge.
Policia është duke ndërtuar skenën e krimit, ndërsa nuk janë kanalizuar vetëm në një pistë. Paraprakisht mendohet se shqiptarët janë ndjekur nga vrasësit, të cilët kanë zgjedhur pikërisht këtë zonë të qetë për të vepruar.
Nga ekspertiza ka rezultuar se plumbat i kanë marrë jetën fillimisht Albanit, i cili ishte në vendin e pasagjerit, ndërsa më pas është vrarë Agron.
Ai në përpjekje për t’iu shpëtuar vrasësve është përplasur me disa automjete në zonë, ndërsa ndjekja e atentatorëve ka zgjatur për 500 metra.
Agron dhe Alban Lleshaj kishin lindur në Rrëshen. Por, para se të lëvizin për në Itali ata jetonin në Lezhë. Përveç trafikut të drogës pista e dytë është ajo e gjakmarrjes, bazuar tek Kanuni. Megjithatë për këtë pistë nuk ka shumë detaje.
Ajo që di policia është se ditë më parë një trafikant shqiptar është arrestuar dhe ai rezulton të jetë xhaxhai i dy viktimave.
BANORËT
“Dëgjova një zhurmë të tmerrshme dhe dola për të parë. Një makinë ishte përmbysur. Mendova se e kishin vjedhur dhe e kishin braktisur, por kur u afrova afër, pashë dy djem në të”, tregon një prej banorëve. Në fakt, ata nuk kanë dëgjuar të shtëna, ndaj kanë lajmëruar policinë për aksident, por vetëm këqyrja në vend e tyre zbuloi se bëhej fjalë për një vrasje.
“Njëri nga djemtë ishte gjallë dhe kërkonte ndihmë. U munduam të kthenim makinën drejt, por nuk mundëm. Kur erdhën karabinierët, ata kishin vdekur”, rrëfen një tjetër banorë.
“Far West” e ka quajtur gazeta “Corriere della Sera”, vrasjen e dyfishtë në periferi të Milanos. Sipas kësaj të përditshmeje, dy vëllezërit janë futur në rrugën “Ancona” për t’i shpëtuar ndjekjes e duket se pikërisht kjo rrugë ka qenë terren i mirë për vrasësin.
Kryetari i bashkisë së zonës tha se vendi i tij ishte kryesisht i qetë. Me përjashtim të disa vjedhjeve të vogla, nuk ka qenë asnjëherë problematike. Kjo ngjarje me sa duket e ka tronditur të gjithë zonën e Canegrates, ku banonin edhe dy vëllezërit shqiptarë.
