Për gazetën “Panorama”, Karaj shprehet se ndodhet në Turqi dhe se është takuar me Izet Haxhinë, me të cilin njihet që në dhjetor të 1990s gjatë Lëvizjes Studentore.
Duke folur për deklaratën e deputetes së PD, e cila tha se ai kishte tentuar vetëvrasjen, Karaj sqaron: “Deklarata e zonjës Elmazi është një kërcënim i hapur që, për çdo gjë që mund të ndodhë nesër, ne do të themi që Romeoja ka pasur edhe më parë tentativa vetëvrasjeje, edhe në të shkuarën. Jam shumë i stabilizuar me veten time dhe e di fare mirë se çfarë kërkoj”.
Ai akuzon Berishën se i eliminon kundërshtarët, por thotë se nuk ka frikë.
“Një gjë është e sigurt: Berisha i eliminon kundërshtarët e tij dhe kjo tregon frikën e tij nga e vërteta. Me akuzat që ka bërë Berisha, përmes deputetes së tij, zonjës Elmazi, nuk mund të denigrojë provën që unë kam paraqitur. Ai është një letërkëmbim i gjatë mes çekëve, që nuk është shkruar nga unë. Ai nuk e priste këtë dhe mendonte se i kishte pastruar të gjitha gjurmët. Prandaj ai hedh akuza të tilla me sfond vetëvrasjeje, për të përgatitur edhe ndonjë ngjarje tjetër më vonë, siç ndodhi edhe me Kosta Trebickën” thotë ai. /b.d
