Dy persona u ekzekutuan këtë të martë në afërsi të mbikalimit të Sukthit.
Ervin Dalipaj ish-shefi i krimit ekonomik në Policinë e Tiranës dhe shoku i tij, Xhino Dautaj u vranë teksa po udhëtonin me automjetin e tyre.
Dëshmitarët që kanë qenë të pranishëm kanë rrëfyer se automjet me të cilin po udhëtonin dy viktimat është ndjekur nga pas nga një makinë tjetër.
Po ashtu, ata thonë se të dy makinat kanë qenë me shpejtësi të madhe, cka lë të kuptohet se Dalipaj dhe shoku i tij mund ta kenë dalluar rrezikun.
“Automjeti ka qenë në rrugën dytësore Durrës-Tiranë, ish-rruga e vjetër dhe janë ndjekur nga një automjet i zi. Dy automjetet kanë qenë me shpejtësi skëterrë. Më pas është qëlluar nga mjeti i zi, ndërsa mjeti “Audi” ka lëvizur 20 m nga rruga dytësore drejt autostradës dhe çdo gjë ka mbaruar në pak minuta. Mjeti i autorëve është larguar në drejtim të Shijakut”, thanë dëshmitarët.
Policia ndodhet në vendin e ngjarjes, dhe ka nisur hetimet për zbardhjen e vrasjes që ndodhi mesditën e sotme.
