A2 CNN ka zbardhur deklaratën e bërë në sallën e gjyqit për një prej dëshmitarëve që konfirmon se Fredi Beleri ka blerë vota në Himarë. Dëshmitari, Ermal Ajdini, shef komisariati në Himarë ka treguar se si ka bashkëpunuar me të infiltruarin, Arsen Rama, e teksa tha se sipas informacioneve që ai dispononte, Beleri në këmbim të votës iu premtonte qytetarëve jo vetëm para, por edhe leje qëndrimi në Greqi.
Ermal Ajdini: Unë në janar të 2023 jam emëruar shef komisariati në Himarë. Arsen Ramën ma kanë prezantuar një koleg polic. Në fund të muajt prill të 2023 më ka telefonuar dhe më ka thënë se po bliheshin vota për Alfred Belerin. Pas marrjes së këtij informacioni unë kam bërë për një javë verifikimet e mia dhe më ka rezultuar që informacioni ishte i vërtet. Më pas kam vënë në dijeni eprorët e mi. Të cilët më kanë thënë që të vë në dijeni prokurorin në lidhje më këtë çështje. Më pas Arsen Rama ka vendosur që të bashkëpunojë me prokurorin, për të bërë veprimet stimuluese. Në dijeninë time ka nënshkruar një marrëveshje bashkëpunimi. Më pas kam marrë urdhër nga prokuroria që të nisja me veprimet dhe kam kontaktuar Arsen ramën për të kryer të gjitha veprimet stimuluese. Rama dhe familja e tij jetonin në Himarë, por më pas ata më kanë shprehur shqetësimin se janë kërcënuar dhe janë dërguar në Vlorë.
Pyetjet e avokatëve.
Ermal Ajdini: Arsen Ramën e kam njohur gjatë muajt shkurt të këtij viti. E kisha numrin e tij të telefonit sepse ai ka bashkëpunuar edhe më herët me policinë për çështje të tjera. Nga shkurt deri në prill e kam takuar 2-3 herë. Pasi kemi përfunduar të gjitha veprimet hetimore referimin e kam bërë gati në zyrë dhe e kam nisur për në drejtorin e Vlorës. Aty kam dërguar edhe Arsen Ramën. Në informacionet qe ne kishim përpos parave qytetareve u janë premtuar edhe leje qëndrimi në Greqi.
Pyetje: A jeni në dijeni që Arsen Rama ka marrë shpërblim nga policia?
Ermal Ajdini: Në dijenin time po, pasi është një procedure e ligjshme. Për më tepër informacion drejtohuni me një kërkesë drejtorisë vendore të policisë së Blorës.
Beleri: A keni dijeni të ketë përgjime pa autorizim të prokurorit?
Ajdini: Në dijeninë time jo, te gjitha përgjimet janë kryer me autorizim të organeve kompetente.
Beleri: Kishit urdhër për të përgjuar të gjithë zyrën time elektorale?
Ajdini: Kemi përgjuar subjektet që na ishin autorizuar nga prokurori.
Beleri: Sa lista ka dorëzuar Rama?
Ajdini: Ka dorëzuar atë listë që ju i keni thënë në telefon, një në zyrë njërën kopje e ka dorëzuar tek ne. Nuk i mbaj mënd emrat e listës.
Kujtojmë se Beleri ndodhet pas hekurave që prej 12 majit. Ai u arrestua dy ditë para zhvillimit të zgjedhjeve lokale nga të cilat doli fitues me diferencë të vogël votash, në përballjen me socialistin Jorgo Goro.
Pavarësisht kësaj, Beleri, i cili ndodhet në paraburgimin e Durrësit, ende nuk ka mundur të betohet si kryebashkiak, pasi drejtësia në disa shkallë ka refuzuar kërkesën e tij për të dalë nga burgu.
