“Nuk e kam vrarë unë. Nuk kam qenë në atë banesë , kam qenë në një vend tjetër”.
Kështu ka deklaruar gjatë natës së shkuar shqiptari Sergio Malaj, i arrestuar një ditë më parë me akuzën e vrasjes së 91 vjeçares italiane Diva Compagnucci, ish mësuese në pension.
Në shtëpinë e viktimës ishte e punësuar nëna e tij.
Shqiptari i është përgjigjur të gjitha pyetjeve të prokurorit Mirko Piloni, duke dhënë versionin e tij të fakteve, ku ka deklaruar se nuk ka qenë në atë pallat dhe nuk ka hyrë në banesën e të moshuarës, duke hedhur poshtë akuzat për vrasjen e saj.
I riu shqiptar nuk ka pranuar fajin dhe akuzën edhe pse disa dëshmitarë kanë deklaruar se Sergio Malaj është parë atë ditë rreth pallatit e mbi të gjitha kundër tij janë dhe veshjet e ndotura me gjak e gati për t’u larë në lavatriçe, të gjetura në banesën e tij, sipas hetimeve.
Për avokatin Andrea Romani, shqiptari ka dhënë versionin e tij, por ka ende elementë për t’u sqaruar e që priten të zbardhen ditën e hënë 28 tetor ku do të zyrtarizohet dhe urdhri i arrestimit.
Sergio Malaj jetonte së bashku me familjen në Tolfa. Ai ka ndjekur shkollën e mesme për elektronikë. Sergio nuk kishte shfaqur më herët probleme, madje për banorët e qytezës prindërit e tij përshkruheshin si njerëz punëtorë e të respektuar, ndaj edhe akuza ka ngjallur habi, gjithsesi hetimet e mëtejshme do të zbardhin të vërtetën.
/a.r
