Henrik Hoxhaj, i arrestuar së bashku me Nuredin Dumanin në kuadër të operacionit “Plumbi i Artë” në vitin 2022, rrezikon të humbasë statusin e bashkëpuntorit të drejtësisë.
Shkak mësohet të jenë bërë disa dëshmi kontradiktore që Hoxhaj ka dhënë përpara prokurorëve të SPAK lidhur me disa ngjarje kriminale. Si dhe qëndrimet e mbajtura për disa ngjarje ku ai ka dyshime se ka marrë pjesë.
Rasti më i fundit ishte zbardhja e 2 atentateve të dështuara në Fier në vitet 2017 dhe 2019, ku objektiv ka qenë Aredin Behari dhe porositës Albert Pashaj.
Këto ngjarje u zbardhën nga dëshmia e një prej personave që kishte marrë pjesë Skerdi Tase dhe jo nga Henrik Hoxhaj i cili në të dy tentativat kishte rol kyç.
Por Hoxhaj nuk është i vetmi që rrezikon të humbasë statusin e të penduarit të drejtësisë. Një tjetër i arrestuar që mund të mos jetë më bashkëpunëtor me SPAK është i riu, Klevis Alla.
Ky i fundit është arrestuar si një nga personat që ka marrë pjesë në 2 vrasje të vitit 2020 në Durrës, ku humbën jetën vëllezërit Besmir e Viktor Haxhia si dhe Dorian Shkoza e Anxhelo Avdiaj.
Për këto ngjarje fillimisht ai tregoi se e kanë realizuar Talo Çela dhe Altin Ndoci, por hetimet zbuluan se vrasjet u kryen nga Nuredin Dumani dhe Henrik Hoxhaj. Fakt ky që është pohuar dhe vetë nga Henrik Hoxhaj.
/f.stafa
