FAO bën thirrje për shtrirje të vaksinimit të gjedhëve për të mbajtur në kontroll dermatozën nodulare në Evropën Lindore dhe Ballkan, veçanërisht në zonat ku rreziku është më i lartë. Në një dokument të botuar sot, FAO paralajmëroi se edhe vendet që nuk janë prekur nga sëmundja e dermatozës nodulare deri më tani, por që konsiderohen në rrezik, duhet të kryejnë vaksinimin bazuar mbi riskun për të shmangur përhapjen e sëmundjes që mund të ketë pasoja shkatërruese për fermerët, sidomos ata të vegjël.
Sëmundja e dermatozës nodulare është një virus i gjedhëve që transmetohet nga pickimi i insekteve që nuk ndikon tek njerëzit, por mund të rezultojë vdekjeprurës për gjedhët. Sëmundja ka qënë e kufizuar vetëm në Afrikë. Në vitin 2013, ajo u shfaq në Turqi dhe më pas u përhap shpejt në nëntë vende në Evropën Lindore dhe në Ballkan.
Në kulmin e përhapjes së sëmundjes në Europë, vendet e goditura nga sëmundja e dermatozës nodulare, kanë regjistruar deri në 200 raste, duke shkaktuar humbje të konsiderueshme ekonomike – si shkak i rënies së prodhimit të qumështit dhe rënies në cilësinë e lëkurës – dhe vdekjes deri në 15 përqind të tufave të prekura.
“Edhe pse në Evropë ishte e pranishme që në prill pas vaksinimeve masive, ne kemi parë që sëmundja rishfaqet në muajt e fundit në Shqipëri, Greqi dhe Maqedoni. Kjo është vetëm një shenjë paralajmëruese se sëmundja nuk është plotësisht e kontrolluar dhe mund të vazhdojë të përhapet nëse nuk bëjmë më shumë përpjekje për ta kontrolluar atë “, tha Ren Wang, Asistent Drejtor i Përgjithshëm i FAO-s, Departamenti i Bujqësisë dhe Mbrojtjes së Konsumatorit.
FAO u bën thirrje qeverive në të gjithë rajonet në rrezik nga sëmundja e dermatozës nodulare që të kryejnë fushata vaksinimi, sidomos përpara sezonit të shfaqjes së insekteve, që zakonisht fillon në mars, kur normat e infeksionit janë më të larta për të parandaluar, kontrolluar dhe eliminuar sëmundjen. Për shembull, vaksinimi parandalues në Kroaci, Bosnje dhe Herzegovinë dhe në veri të Serbisë do të krijonte një zonë mbrojtëse dhe do ta ndalonte sëmundjen nga përhapja e mundshme në vendet fqinje si Hungaria dhe Rumania, të cilat kanë shpëtuar deri më sot nga kjo sëmundje.
FAO paralajmëroi se heqja dhe largimi i menjëhershëm i të gjitha kafshëve të infektuara nga një fermë – duhet të përdoret si një mjet i fundit, sepse heqja mund të ketë një ndikim drastik në fermat e fermerëve, veçanërisht të fermerëve të vegjël. Nëse largimi konsiderohet i nevojshëm, FAO rekomandon që kjo të bëhet vetëm në rastin e kafshëve të prekura klinikisht, kur infeksioni konfirmohet nga një laborator i autorizuar dhe kafshët duhet të eliminohen duke respektuar standartet e mirëqenies së kafshëve në mënyrën e duhur dhe sa më shpejt që të jetë e mundur.
FAO ka luajtur një rol të rëndësishëm në reformimin e politikave të shteteve në mënyrë që vaksinimi të përdoret si një masë kyçe për të parandaluar sëmundjen e dermatozës nodulare dhe për të minimizuar humbjet.
“Pavarësisht progresit të bërë në luftimin e sëmundjeve të lëkurës, ka ende disa zona gri në të cilat duhet të përqendrohemi. Për këtë, ne duhet të kuptojmë më mirë për shembull nëse sëmundja e dermatozës nodulare mund të transmetohet nga një kafshë në tjetrën nëpërmjet qumështit të infektuar, dhe nëse kafshët e infektuara që nuk tregojnë shenja klinike munden ende të përhapin virusin “, tha Ren Wang, Asistent Drejtor i Përgjithshëm i FAO-s, Departamenti i Bujqësisë dhe Mbrojtjes së Konsumatorit.
“Nevojitet gjithashtu një koordinim më i mirë rajonal dhe mbikëqyrje më e lartë për të trajtuar më efektivisht përhapjen e sëmundjes”, shtoi Ren Wang.
Paralelisht, FAO ka mbështetur vendet në luftën e tyre kundër sëmundjeve të dermatozës në terren. Përmes një sërë projektesh rajonale, FAO ka prodhuar një manual drejtuar veterinerëve në në terren, i cili është tashmë në gjuhët angleze dhe shqipe dhe së shpejti do të jetë në dispozicion në gjuhët maqedonisht, rusisht, serbisht dhe turqisht. Trajnimi për programin e trajnerëve për veterinerët në terren, u prezantua kohët e fundit në Ish Republikën Jugosllave të Maqedonisë duke u përqendruar në sëmundjen e dermatozës nudolare dhe sëmundjen e gjuhës blu, me trajnimin e tetë trajnerëve kryesorë, të cilët do ta përsërisin atë në rajone të ndryshme të vendit. Së fundmi, është krijuar një model për një plan emergjence, i cili mund të përshtatet nga shtetet sipas rrethanave dhe nevojave të tyre.
Një plan emergjence, tha Andriy Rozstalnyy , zyrtar për shëndetin e kafshëve i FAO-s, është një instrument kyç për gatishmërinë dhe kontrollin në raste emergjence për këtë sëmundje.
