Mjeku Eno Kanani i prekur nga Covid-19 prej disa ditësh i shtruar në spital, pati komplikacione aq sa u kërkua dërgimi i tij jashtë vendit.
Gjendja e tij është përkeqësuar gjatë dy ditëve të fundit, ndonëse mësohet se fatmirësisht në orët më të fundit shëndeti i tij është stabilizuar disi.
Miqtë e mjekut ngritën një fushatë për mbledhjen e fondeve me qëllim dërgimin e tij në Turqi, për një trajtim më të specializuar.
Një mik i huaj, David Hosaflook, organizatori i fushatës, tha sot pas mbledhjes së fondeve, “lavdi Zotit që Dr. Eno është stabilizuar deri diku, pra gjendja e tij nuk u keqësua gjatë natës, dhe në këtë çast po përgatitet për të udhëtuar në Turqi për trajtim”.
“Që tani e deri në orën 18, ai ka nevojë për lutje të veçantë, sepse udhëtimi ka problemet e veta”, – u shpreh David, pak orë para nisjes së tij drejt Turqisë.
Më herët ai dha lajmin se falë fondeve të grumbulluara në rrjet, është siguruar një charter me të cilin pasdite mjeku shkodran do të dërgohet në një spital në Turqi. Eno Kanani, 42-vjeç, është baba i tre fëmijëve.
