Deputetja socialiste Mimoza Hafizi, del në krah të Ben Blushit.
Ajo thotë se mbështet kërkesën e Blushit për zbatimin e statusit të PS-së për zgjedhjen e kreut të partisë.
Në një status në FB, Hafizi shkruan se i ka ofruar mbështetje Blushit për platformën që do të paraqesë në Kongres.
Hafizi bëhet e para deputete nga PS që mbështet publikisht Blushin, ndërkohë që zërat e tjerë publik deri më tani janë shprehur se kërkesa e Blushit për zgjedhjen e kryetarit të partisë është e pakuptimtë, duke qenë se kjo parti ka fituar zgjedhjet.
“Miq të nderuar!
I bashkohem kolegut tim Ben BLUSHI në kërkesën për respektimin dhe zbatimin e statutit të Partisë Socialiste e normave themelore të qënies bashkë në këtë grupim të madh politik. I kam ofruar mbështjetje në rrugëtimin dhe platformën për Kongresin e ardhshëm të Partisë.
Do mundohem të përcjell në këtë dokument dhe në aspiratat tona për të ardhmen e partisë ku bëjmë pjesë, të gjithë përvojën e punës sime shumëvjeçare me strukturat socialiste të Tiranës e Shkodrës, zërin kritik të socialistëve shkodranë, analizat e përgjegjshmërisë qeverisëse deri në nivel bazë dhe reflektimet për një frymë të re bashkëpunimi e respekti.
Mirëpres çdo sugjerim, besoj që kauza e një partie të madhe nuk i përket vetëm antarëve të saj, por çdo qytetari”, shprehet Hafizi.
