Operatori i Shpërndarjes së Energjisë Elektrike ka reaguar pas akuzave të deputetes së PD Arbjola Halimi për mbifaturim.
Një ditë më parë, ajo postoi në Facebook një fotografi të faturës së saj të energjisë me shënimin “fatura ime se sa e hapa. Dhe unë nuk jam kurrë në shtëpi…!”.
OSHEE reagoi duke sqaruar se abonentja është faturuar në mënyrë korrekte, sipas konsumit që ka patur çdo muaj për kontratën me numër 12143. Sasia e kilovatëve të shënuara në faturën e abonentes është e njëjtë me sasinë që shënohet në aparatin matës.
Për ta ilustruar këtë fakt, Operatori i Shpërndarjes ka bërë transparencën me fotografi të sahatit të deputetes ashtu sikurse edhe historikun e konsumit gjatë 12 muajve të fundit.
Historiku i konsumit të kontratës së abonentes Arbjola Halimi:
Prill 2015 425 kWh
Maj 2015 228 kWh
Qershor 2015 166 kWh
Korrik 2015 194 kWh
Gusht 2015 57 kWh
Shtator 2015 146 kWh
Tetor 2015 278 kWh
Nëntor 2015 438 kWh
Dhjetor 2015 459 kWh
Janar 2016 639 kWh
Shkurt 2016 666 kWh
Mars 2016 803 kWh
Prill 2016 170 kWh
Operatori i Shpërndarjes thotë se sulmet e qëllimshme politike si rasti i deputetes Halimi synojnë thjesht baltosjen e punës së kompanisë dhe rikthimin e situatës kaotike në sektorin energjitik.
