Deputeti socialist, Sadi Vorpsi, ka dënuar sot dhunën ndaj policisë gjatë protestës para Kuvendit.
Përmes Facebook, Vorpsi shkruan se akti barbar është i patolerueshëm, duke theksur dy plagosjet e rënda të ndodhura sot.
Sipas tij, dhuna e frymëzuar nga opozita duhet të ndalet.
“Asnjë kauzë nuk e justifikon dhunën e ushtruar sot para Kuvendit të Shqipërisë.
Informacionet e para flasin për plagosjen e 12 efektivëve të policisë.
Një efektive femër ka humbur katër gishtat e njërëz dorë dhe një efektiv ka humbur dëgjimin si pasojë e hedhjes së mjeteve piroteknike.
Me besimin që kam marrë prej jush dhe arsyet që burojnë si qytetar i këtij vendi, dënoj me forcën më të madhe ngjarjen e rëndë. Dënoj frymëzimin e dhunës nga opozita dhe heshtjen e saj.
Tashmë kemi një bilanc të rëndë. Ai që guxon të ngrejë dorë mbi policin e shtetit përbën rrezik edhe për qytetarët.
Ndaj në cilësinë edhe të anëtarit të Komisionit të Sigurisë, i bëj thirrje strukturave të hetojnë me shpejtësi dhe të dënojnë dhunuesit.
U bëj apel protestuesve t’i referohen ligjit për atë çfarë u takon sepse e drejta nuk fitohet me kapsolla, grushta e shkelma. Shërim të shpejtë të lënduarve, me bindjen se akte të tilla nuk do të përsëriten më!” – shkruan deputeti Sadi Vorpsi.
