Deputeti i Partisë Demokratike, Agron Shehaj, thotë se Rama kërkon të godasë PD-në me reformën në drejtësi.
“Rreziku është që nga një gjyqësor i korruptuar, por i pavarur të kalojmë një gjyqësor të korruptuar dhe të varur nga qeveria. Do ta shikojmë, ka shumë mundësi që Rama të përdorë drejtësinë për të sulmuar PD-në. PD është e hapur për çdo hetim, por po nuk u dënua edhe kupola socialiste nuk do ketë kurrë drejtësi”, thotë ai në një intervistë për “Gazeta Shqiptare”.
Shehaj shprehet se Rama mund t’i mbyllë gojën atij, me akuzat për evazion fiskal.
“Absolutisht po. Asgjë nuk e ndalon Ramën të kërkojë të më mbylli gojën duke më akuzuar për evazion fiskal për shembull, apo ndonjë akuzë tjetër që mund të gatuajë. I ka të gjitha nën kontroll nga inspektorët, te shumica parlamentare për të më hequr imunitetin, te kryeprokurorja për të më hetuar dhe gjykatësit për të më dënuar. Prandaj ndarja e pushteteve është elementi themelor i demokracive liberale”, shprehet ai.
I pyetur për debatet e tij në Komisionin e Ekonomisë me Erjon Braçen, Shehaj shprehet:
“Me Braçen dhe politikanët si Braçe më ndajnë idealet dhe puna. Braçe nuk ka punuar ndershmërisht një ditë të vetme në jetën e vet, unë kam filluar punë që 14 vjeç dhe arrita të krijoja kompaninë private me të madhe në Shqipëri, mbi 3000 të punësuar. ‘Ujqërit’, të mëdhenj dhe të vegjël si Braçe e mbajnë peng Shqipërinë, mbajnë larg investitorët dhe janë arsyeja kryesore pse shqiptarët ikin. Pas 27 vitesh do më vinte turp të vazhdoja në politikë, por për disa turpi nuk është arsye për t’u larguar nga politika”.
Deputeti i Bashës sulmon edhe ndërkombëtarët, duke thënë se atyre iu intereson stabiliteti, jo e drejta.
Për këtë arsye, sipas tij, Shqipërinë mund ta bëjnë vetëm shqiptarët:
“Nuk flas dot për qëndrimin e ndërkombëtarëve, ata sigurisht kanë një vizion më të gjerë. Por po t’i pyesësh cili është prioriteti midis interesit të Shqipërisë dhe të vendit që ata përfaqësojnë, nuk kam dyshim se do ju thonë që ata janë këtu për të ndjekur interesin e vendeve të tyre në radhë të parë. Unë kam besim dhe jam i bindur që ata njëkohësisht punojnë për të mirën e shqiptarëve, por në disa raste për ta mund të ketë përparësi nevoja për stabilitet në Shqipëri.
Personalisht kam shumë besim te ndërkombëtarët dhe si shqiptar jam shumë mirënjohës për çfarë bëjnë, por nuk mund të presim me shumë se ç’duhet nga ndërkombëtarët. Ata mund të na ndihmojnë, por vetëm shqiptarët mund ta bëjnë Shqipërinë”.
“Për këdo që do një jetë më të mirë, është më e thjeshtë të ikësh në Gjermani se sa të luftosh me Braçen, Ballën apo Tahirin. Në fakt, vetëm nëse personazhe të tillë, jo vetëm do të lënë pushtetin, por do të zhdukeshin nga politika, shqiptarët mund të fillojnë të ndërtojnë një shoqëri më të mire”, e mbyll intervistën e tij Shehaj
