Dashamir Shehi është shprehur kundër cilësimit si tradhëtar, të deputetëve të rinj që pranuan mandatin dhe u futën në Parlament.
I fruar në emisionin ‘Arena’ me Dritan Hilën, Shehi ka dalë kundër kryedemokratit Lulzim Basha, duke thënë se ata emra janë turp për kryetarët e partive, pasi ata i kanë futur në lista.
“Këta i ka vu në listë kryetarët e partive dhe është një turp për kryetarët e partive që kanë vënë këto. Unë jam aleat me Bashën. Nuk kemi të drejtë me vënë. Ata që kemi vënë ne nuk na kanë qëlluar tradhëtor. Unë nuk dua t’i konsideroj tradhëtor”, ka thënë ndër të tjera Dash Shehi.
Më tej ai tha se është ndjerë i turpëruar kur ka kuptuar se është i 11-ti në listën e deputetëve për Qarkun e Tiranës.
“Unë e kam marrë vesh që jam i 11-ti në Tiranë, e kam marrë vesh ditën e fundit. Jam ndjerë shumë i poshtëruar. Të më falin ata 10 veta që janë përpara meje. Midis të cilëve ka njerëz të rëndësishëm politikisht si Basha dhe Berisha por midis atyre ka njerëz që janë një hiç! Jam ndjerë i turpëruar. Unë them se ka ardhura dita që sistemi jonë të ketë një element mazhoritar. Ose do të kemi si sistemin e vjetër ose të kemi një listë të hapur siç është në Kosovë apo në Itali. Dy partitë e mëdha nuk kanë dashur ta bëjnë kurrë. Fatmirësisht, zt.Basha e ka kuptuar që ky sistem është i falimentuar. Herën e fundit e artikuloi këtë dhe mendoj se jemi në rrugë të mbarë. E dyta, gjykoj se nuk është i mjaftueshëm vetëm ndryshimi i sistemit zgjedhor”, deklaroi Shehi.
