Diskutimet e gjata dhe renditja e diskutantëve në Kongresin e Partisë Socialiste duket se janë kthyer në shqetësim për një pjesë të delegatëve dhe kryesisht të deputetëve.
Ka qenë Taulant Balla ai që më herët ka paralajmëruar për vendosjen e një kronometri sa i përket fjalëve që do të mbahen në podium para të pranishmëve. Pas këtij propozimi, Balla ka marrë drejtimin e punimeve të Kongresit duke e bërë të ngjajë si një seancë plenare e Kuvendit.
Burime për JavaNews nga grupi i deputetëve thanë sot se shqetësues është fakti se ministrat po flasin njëri pas tjetrit, ndërsa deputetëve u duhet të presin sa të mbarojë i gjithë stafi qeveritar. Edhe pse kanë kërkuar fjalën dhe janë përfshirë në listën e pritjes për të folur, një pjesë e tyre madje janë tërhequr nga fjalimi.
Respektimi i kohës ka qenë një tjetër shqetësim për punimet e tejzgjatura të Kongresit, ndërsa edhe fjala e shumëpritur e deputetit Ben Blushi është shtyrë për shkak të fjalimeve të gjata. Për këtë arsye, Balla ka ndërhyrë duke i kujtuar kohën zv.kryeministrit Niko Peleshi. Në kongresin e Partisë Socialiste marrin pjesë 1500 delegatë, ministra, deputetë, krerë të partive në koalicionin qeverisës dhe miq të huaj të Internacionales.