Kryeministri Edi Rama u kërkoi qytetarëve që të ndajnë eksperiencat e tyre negative në zyrat e shtetit, në mënyrë që të nxjerrin një raport të veçantë për grupin që po punon për reformimin rrënjësor të rrjetit të zyrave të shtetit.
“Për të bashkëqeverisur me sukses në katër vitet e ardhshme është shumë e rëndësishme që çdo njeri i zakonshëm, të ngrejë zërin kur del i pakënaqur apo, ende më keq, i fyer nga një zyrë shteti. Platforma e Bashkëqeverisjes SHQIPERIA QE DUAM, e cila do t’ju jepet për gjykim në formë paraprake në fillim të javës, do të sigurojë lidhjen tuaj direkte me kabinetin qeveritar, edhe për rastet e eksperiencave negative në zyrat e shtetit”, u shpreh ndër të tjera Rama në statusin e tij.
Të menjëhershme kanë qenë reagimet e shqiptarëve të cilët kanë “spiunuar” rastet kur në zyrat e shtetit janë bërë padrejtësi apo abuzime të ndryshme. Ndonëse akoma nuk kanë kaluar 24 orë nga kërkesa e Ramës, deri më tani kanë denoncuar 2161 persona.
Mbetet për t’u parë nëse pas verifikimeve të denoncimeve nga qytetarët, Rama do të reformojë rrjetin e zyrave të shtetit./Newsbomb.al/ b.d
