Akuzon taksistin për përdhunim, por rezultoi se gjithçka ishte një gënjeshtër për të marrë shpërblim. Claire Morgan, një 35-vjeçare nga Uellsi, denoncoi në polici se ishte përdhunuar nga taksisti që po e çonte në shtëpi në Bridgend, kur në të vërtetë burri ishte i pafajshëm.
Ngjarja është shënuar rreth një muaj më parë, kur gruaja u paraqit në polici për të denoncuar përdhunimin e pretenduar.
Siç raportojnë mediat vendase, gruaja e tregoi me detaje gjithë ngjarjen, duke thënë se po udhëtonte me taksi, kur pikërisht përpara shtëpisë së saj, shoferi e kishte prekur në gjinj dhe në pjesët intime, ku vetëm pas rezistencës, Claire pretendon se arriti të arratisej.
Menjëherë pas denoncimit të saj, në ngarkim të taksistit nisën hetimet, ndërkohë që kompania e shkarkoi nga puna.
Kur hetimet duket se po shkonin në favor të saj, duke shpresuar për një dëmshpërblim, gruaja hapi një profil fals në Facebook, nëpërmjet të cilit deklaronte se ishte dëshmitare okulare e ngjarjes.
Taksisti u arrestua, por këmbëngulja e miqve dhe kolegëve dhe provat e siguruara provuan pafajësinë e tij, shkruan noa.al.
Përballë hetimeve që u kthyen kundër saj Morgan u arrestua këtë fillim jave dhe u detyrua që të pranojë se kishte sajuar gjithçka, me synim përfitimin e shpërblimit.
