Futbollisti shqiptar, Mërgim Berisha është akuzuar nga bashkëshortja e tij për dhunë. Vesa Vllasaliu ka akuzuar sulmuesin e Fenerbahçes se e ka rrahur, si edhe nuk e ka lejuar të marrë sendet personale në banesën ku jetonin së bashku.
Vllasaliu ka ngritur padi ndaj futbollistit në një Gjykatë në Anadoll, ku thuhet se ata jetonin së bashku që nga shtatori i vitit 2021 dhe planifikonin të martoheshin së bashku muajin e ardhshëm.
Në padi pretendohet se Berisha ka ushtruar dhunë ndaj saj dhe e ka nxjerrë me forcë nga banesa në Umraniye, ku jetonin së bashku.
Ajo shprehet se futbollisti nuk e ka lejuar të marrë as rrobat dhe as sendet personale kur e dëboi me forcë nga banesa.
Sipas saj, sulmuesi kishte urdhëruar rojet e sigurisë që të mos e lejonin atë që të hynte më në shtëpi.
“Qëllimi i saj është të marrë sendet personale dhe të ndërpresë çdo marrëdhënie me palën tjetër. Megjithatë, klienti (Vesa Vllasaliu) mund të ekspozohet sërish ndaj dhunës nga pala tjetër (Mergim Berisha). Përveç kësaj, ai ka përdorur fjalë fyese, sharje e ofendime ndaj avokatit”, shkruhet në padi, ku pretendohet se Berisha ka kërcënuar ish-partneren.
Ai akuzohet në padi se ka kryer veprën penale të plaçkitjes duke mos i dhënë sendet personale Vesa Vllasaliut. Ndërsa u kërkua që ndaj tij të nisë një hetim.
Gjykata vendosi që futbollisti të mos afrohet për 2 muaj në banesën apo vendin e punës së ish-partneres së tij.
Gjithashtu, gjykata tha se Berisha nuk duhet të shqetësojë për dy muaj Vllasaliun përmes mjeteve të komunikimit, apo mjeteve të tjera, dhe nëse konstatohet se ai nuk respekton vendimin atëherë do të dënohet me 3 deri në 30 ditë burg./m.j
