Hetimi për Emiliano Shullazin, Gilmando Danin dhe Blerim Shullazin ka nisur në shkurt, me akuzën për pjesëmarrje në organizatë kriminale, gjobëvënie dhe shkatërrim të pronës, bazuar në denoncimin e bërë nga biznesmeni Arjan Zika.
Ky i fundit ka deklaruar në polici se është kërcënuar për një sipërfaqe toke prej 1200 metra katrorë.
Sipas kallëzimit të Zikës, Shullazi i ka kërkuar që të blinte me çmimin e tregut të sotëm sipërfaqen që kishte blerë para disa vitesh, ndryshe do ta paguante me jetë.
“Emiliano më tha ose blije sërish me çmimin e tregut të sotëm, ndryshe do të të vras. E kam takuar katër herë Shullazin dhe nuk pranova”, ka deklaruar Zika.
Pas refuzimit të biznesmenit për të riblerë tokën me një çmim tjetër, dyqanit të Zikës i është vënë eksploziv më 13 mars.
Nga frika, ai është larguar nga Shqipëria, duke qenë se edhe pas denoncimit në polici nuk kishte asnjë veprim ligjor.
Shullazi ndërkohë po hetohet edhe për kalimin në pronësi të ish-hotel “Vollga”.
Dyshohet se ky ndryshim ka ardhur përmes kërcënimeve.
Ai akuzohet edhe për kërcënimin e 4 biznesmenëve të tjerë.
