Ministrja e Financave, Anila Denaj zhvilloi një takim me ambasadorin e Norvegjisë, Jens Erik Grondahl, ku palët vlerësuan marrëdhëniet në rritje mes dy vendeve.
Ambasadori Grondahl shprehu angazhimin dhe interesin e qeverisë norvegjeze për të intensifikuar më tej marrëdhëniet ekonomike midis dy vendeve. “Diskutuam mbi zhvillimin e ardhshëm të ekonomisë vendase dhe vëmendjen e shtuar në tërheqjen e investimeve te huaja direkte me prioritet në sektorët ku ekonomia shqiptare ka potencial për të shfrytëzuar”, u shpreh Denaj.
Denaj tha se këta sektorë janë ai i energjisë i energjisë së rinovueshme, i turizmit, i agrobiznesit, i infrastrukturës, formimi dhe arsimi profesional, teknologjia e informacionit.
“Shqipëria ka përshtatur një kuadër ligjor mikpritës, të projektuar për krijimin e një klime të favorshme për investitorët e huaj”, u shpreh Denaj.
Sipas saj, mbështetja e Norvegjisë në procesin e integrimit evropian dhe shkëmbimi i eksperiencës norvegjeze për përafrimin e legjislacionit vendas ishte një nga pikat kryesore gjatë diskutimeve.
“Shpreha mirënjohje për vëmendjen që Norvegjia tregon ndaj Shqipërisë dhe rajonit në përgjithësi dhe se ky bashkëpunim duhet intensifikuar më tej, veçanërisht në drejtim të shkëmbimeve ekonomike”,tha Denaj.
