Komisioni Qëndror i Zgjedhjeve pritet të verifikojë të enjtenformularët e vetëdeklarimit në kuadër të ligjit të Dekriminalizimit për kryetarin e Bashkisë së Krujës Artur Bushi dhe Elvis Rroshin e dorëhequr nga bashkia e Kavajës.
Verifikimi i formularëve do të kryhet pas kërkesës së prourorisë e cila kërkoi verifikimin e disa informacioneve nga vendet e huaja.
Po ashtu në mbledhjen e së enjtes është parashikuar edhe kalimi i mandatit të Koço Kokëdhimës për personin që e pason në listën shumëemërore të PS-së në qarkun Vlorë.
Ja rendi i ditës i KQZ-së:
Komisioni Qendror i Zgjedhjeve, ditën e enjte, më datë 09.06.2016, ora 10:00, zhvillon mbledhjen me këtë rend dite:
Projekt vendim: “Verifikimi i deklarimeve në formularin e vetëdeklarimit të funksionarit publik z. Elvis Roshi, kryetar i Bashkisë Kavajë, në zbatim të ligjit nr.138/2015 “Për garantimin e integritetit të personave që zgjidhen, emërohen ose ushtrojnë funksione publike”.
Projekt vendim: “Verifikimi i deklarimeve në formularin e vetëdeklarimit të funksionarit publik z. Artur Bushi, kryetar i Bashkisë Krujë, në zbatim të ligjit nr.138/2015 “Për garantimin e integritetit të personave që zgjidhen, emërohen ose ushtrojnë funksione publike”.
Projekt vendim: “Për dhënien e mandatit të deputetit të Kuvendit, kandidatit të radhës të listës shumemërore të Partisë Socialiste në Qarkun Vlorë, për plotësimin e vakancës së njoftuar nga Kuvendi i Shqipërisë. /a.m.
