Komisioni Qendror i Zgjedhjeve është mbledhur këtë të premte për të verifikuar e më pas për të vendosur për publikimin apo jo të formularëve të vetëdeklarimit të zyrtarëve, në bazë të ligjit të Dekriminalizimit.
Sekretari i KQZ-së Skënder Vrioni tha se të gjithë deputetët dhe kryebashkiakët kanë plotësuar formularët e vetëdeklarimit. Vetëm 64 këshilltarë bashkiakë nuk kanë plotësuar sipas tij këto formularë dhe sipas ligjit do duhet të përjashtohen nga detyra.
Anëtari i KQZ Hysen Osmanaj ka kërkuar nga kolegët e tij që formularët e vetëdeklarimit të publikohen sepse ligji për dekriminalizimin e bën të qartë dhe detyrim këtë veprim.
KQZ ka bërë një kërkesë në Komisionerit për Mbrojtjen e të Dhënave Personale, nëse është ligjore apo jo publikimi i të dhënave që kanë formularët e vetëdeklarimit, në kushtet kur ky akt mund të cilësohet si një shkelje e të drejtës për të mbrojtur të dhënat personale. Por sipas kryetares së KQZ-së, nuk ka ardhur ende një përgjigje nga ky komision. javanews/ a.k
