Asambleja e Përgjithshme miratoi edhe një rregullore për kriteret morale për të zgjedhurit e partisë.
Në prag të zgjedhjeve të 2017-s, PS do të kërkojë formularin e vetëdeklarimit nga çdo individ që do hyjë në struktura, ku do të vetëdeklarohet konflikti i interesit dhe gjendja gjyqësore, raporton Dita.
Në ligjin e miratuar për dekriminalizimin, thuhet se çdo parti politike e regjistruar, ka të drejtë që t’i paraqesë prokurorit të Përgjithshëm kërkesë për verifikim paraprak për kandidatura të mundshme të saj në zgjedhje apo organe kushtetuese ose të krijuara me ligj, me qëllim vlerësimin e ekzistencës së rrethanave që përbëjnë kusht ndalues, sipas ligjit nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike”.
Me përjashtim të partive parlamentare, partitë e tjera politike, së bashku me kërkesën për verifikim paraprak, dorëzojnë edhe një kopje të akteve që provojnë regjistrimin e tyre, sipas legjislacionit në fuqi. Kërkesa për verifikim paraprak përmban: a) gjeneralitetet e kërkuesit dhe të dhënat e plota të regjistrimit të partisë politike; b) gjeneralitetet e plota të shtetasit që është subjekt verifikimi; c) pëlqimin e shtetasit që është subjekt verifikimi; ç) funksionin publik, në të cilin pretendohet të kandidojë apo të emërohet shtetasi që është subjekt verifikimi; d) nënshkrimin e kryetarit të partisë apo të një personi të autorizuar prej tij, si dhe shtetasit që është subjekt verifikimi.
Kërkesa për verifikim paraprak mund të bëhet në çdo kohë, edhe jashtë periudhës zgjedhore apo jashtë periudhës kur është shpallur vendi vakant.
Rezultati i verifikimit paraprak mbetet konfidencial dhe i njoftohet vetëm kërkuesit dhe personit të verifikuar.
Prokuroria e Përgjithshme, brenda 15 ditëve nga hyrja në fuqi e këtij vendimi, publikon në faqen web të institucionit versionin elektronik të kërkesës për verifikim paraprak. Ky format duhet të jetë i aksesueshëm lirisht nga publiku, të krijojë mundësinë për plotësimin e tij në mënyrë elektronike, si dhe i disponueshëm lirisht për printim.
