Vetëm 13% e zyrtarëve kanë dorëzuar formularin e vetëdeklarimit, një dokument që u bë pjesë e ligjit të dekriminalizimit. Sipas njoftimit të Komisionit Qendror të Zgjedhjeve, bëhet fjalë për deputetët, anëtarët e Këshillit të Ministrave, Kryetarët e Bashkive dhe Këshilltarët bashkiakë. KQZ shkruan se vetëm 225 persona nga 1836 gjithsej kanë sjellë formularin e vetëdeklarimit, teksa data finale është 4 maji.
NJOFTIMI I KQZ
Pranë Komisionit Qendror të Zgjedhjeve, në zbatim të ligjit nr.138/2015 “Për garantimin e integritetit të personave që zgjidhen, emërohen ose ushtrojnë funksione publike” dhe vendimit të Kuvendit nr. 17/2016 “Për përcaktimin e rregullave të detajuara mbi zbatimin e ndalimeve të parashikuara në ligjin nr.138/2015”, kanë detyrimin të dorëzojnë formularin e vetëdeklarimit;
1-Deputetët e Kuvendit të Shqipërisë
2-Anëtarët e Këshillit të Ministrave që nuk kanë mandat deputeti
3-Kryetarët e bashkive
4-Këshilltarët bashkiakë.
Aktualisht nga 1836 funksionarë, kanë dorëzuar formularët e vetëdeklarimit pranë KQZ-së, 255 ose 13,9 % % e tyre. Komisioni Qendror i Zgjedhjeve, në vlerësim të faktit se afati përfundimtar për dorëzimin e formularëve të vetëdeklarimit, është data 4 Maj 2016 dhe numri i subjeketeve që ende nuk e kanë dorëzuar, është i konsiderueshëm, kërkon mirëkuptimin e tyre për ta dorëzuar sa më parë formularin, duke pasur në vemendje:
•formulari duhet të plotësohet me kompjuter, me përjashtim të emrit e mbiemrit dhe nënshkrimit (në fund të çdo faqeje) që duhet të plotësohen me shkrim dore;
•formulari, pasi të jetë plotësuar e printuar, nënshkruar, të depozitohet në KQZ personalisht (dorazi) nga secili funksionar që ka detyrimin për të dorëzuar formularin e vetëdeklarimit.
•Formulari i vetëdeklarimit ndodhet ne faqen zyrtare të internetit të KQZ-së, www.cec.org.al dhe është i aksesueshëm për të gjithë.
