Kuvendi ka rrëzuar sot dekretin e presidentit Ilir Meta për rishqyrtim të buxhetit të vitit 2019.
Mësohet se për dekretin pati 76 vota kundër dhe 22 vota pro.
Duke marrë shkas nga kërkesat e studentëve, te cilet prej ditesh protestojnë, kreu i shtetit ktheu më datë 13 dhjetor ligjin për buxhetin sërish në Kuvend.
Kjo lëvizje e Metës erdhi si një mundësi për plotësimit të kërkesave që kanë studentët e që lidhen direkt me buxhetin adresuar për ta. Por edhe si një vijimësi për t’u hapur rrugë amendamenteve të LSI, propozuar po atë ditë.
“Duke ndjekur me vëmendje situatën si dhe duke vlerësuar konsensusin e gjerë publik mbi kërkesat e studentëve, të cilat janë konsideruar nga të gjithë aktorët politikë si, të drejta, legjitime dhe të realizueshme, duke synuar interesin më të mirë në përmbushjen e objektivave sociale të parashikuara në nenin 59 të Kushtetutës, si dhe në garantimin e stabilitetit në vend, me dekretin nr. 10997, datë 13.12.2018 ka vendosur “Kthimin për rishqyrtim në Kuvend të ligjit nr.99/2018 “Për buxhetin e vitit 2019”, me qëllim rishqyrtimin e tij” – thuhej në njoftimin e presidentit pak ditë më parë.
/a.rada
