Pas disa ditësh protesta masive të papara më parë, qeveria rumune njoftoi shfuqizimin e dekretit lidhur me masat ligjore që zbusin dënimet për korrupsion.
Manifestuestit e shumtë fituan kauzën e tyre. Kryeministri social-demokrat Sorin Grindeanu njftoi të shtunën shfuqizimin e dekretit mbi masat ligjore që zbusin dënimet për korrupsion, që shkakoi një zemërim të gjerë popullor, i cili u shoqërua me disa ditë protesta.
Këto ishin protestat më të mëdha të zhvilluara në Rumani që nga rënia e komunizmit.
Në këtë mënyrë, shefi i ekzekutivit shpreson të zbusë zemërimin e qindra mijëra rumunëve që kanë marrë pjesë në protestat e ditëve të fundit, gjatë të cilave kërkuan me këmbëngulje anulimin e dekretit të miratuar të martën dhe dorëheqjen e qeverisë.
“Nesër, do të mblidhemi për të shfuqizuar këtë dekret”, deklaroi kryeministri Grindeanu duke pohuar se shpresonte të mos “përçante Rumaninë” me këtë reformë.
Sipas mediave, njoftimi i kryeministrit u prit me gëzim nga më shumë se 100 000 protestues të mbledhur përpara selisë së qeverisë në Bukuresht e qindra mijëra të tjerë në mbarë vendin./b.d
