Një punonjës policie është vënë në pranga, pasi akuzohet se dekonspironte operacionet e vetë policisë. Bëhet fjalë për inspektorin Engrid Hënaj, me detyrë trup shërbimi në Repartin “Shqiponja”, në Drejtorinë e Policisë së Tiranës.
Në një njoftim të Ministrisë së Brendshme, thuhet se arrestimi i tij erdhi pas një hetimi të përbashkët me Prokurorinë e Rrethit Gjyqësor Kavajë, falë aplikimit të metodave speciale të hetimit.
Nga hetimi ka rezultuar se ky punonjës policie, në disa raste ka bashkëpunuar me F.L., një person i arrestuar për veprën penale të vjedhjes në bashkëpunim, më shumë se një herë.
“SHÇBA ka siguruar prova se kundrejt marrjes së shumave të ndryshme të parave dhe favoreve të tjera, punonjësi i policisë, në shumë raste i jepte informacione mbi veprimet policore që kryheshin, shtetasit të mësipërm dhe personave të tjerë të implikuar ne veprimtari kriminale”, thuhet në njoftim.
Vazhdojnë hetimet për implikimin e punonjësve të tjerë të policisë të përfshirë, ndërsa Hënaj akuzohet për shpërdorim detyre dhe përkrahje të autorit të krimit.
a.ç
